Libri i Mormonit është një libër shkrimi të shenjtë të frymëzuar që ekziston për t’ju dhënë drejtim në jetën tuaj dhe për t’ju lidhur me Jezusin. Nga vjen emri? Qindra vjet më parë në kontinentin e lashtë amerikan, një profet me emrin Mormoni përpiloi një anal të popullit të tij. Ata u përballën me shumë nga po ato sfida me të cilat përballemi edhe ne. Dhe, po ashtu si ne, ata gjetën forcë kur iu drejtuan Jezu Krishtit.

Libri i Mormonit ka si synim të lexohet krahas Biblës si një dëshmi tjetër e Jezu Krishtit dhe misionit të Tij hyjnor si Shpëtimtari dhe Shëlbuesi i botës. Së bashku, Bibla dhe Libri i Mormonit japin më shumë kuptueshmëri për dashurinë e madhe të Perëndisë për të gjithë ne dhe mund të na ndihmojnë të vijmë më pranë Tij.

Ashtu si Bibla, Libri i Mormonit dëshmon për Jezu Krishtin. Ngjarja qendrore e shënuar në Librin e Mormonit, është vizita e Jezu Krishtit, përfshirë mësimet dhe shërbesa e Tij, te besimtarët në kontinentin e lashtë amerikan. Ky rrëfim tregon se Perëndia ua shtrin të njëjtat bekime dhe mundësi të gjithë fëmijëve të Tij dhe se dashuria e Tij nuk është e kufizuar për njerëzit nga një zonë e vetme e botës. Pavarësisht nga gjuha që flasim apo se si dukemi, Perëndia na do dhe dëshiron që të vijmë më pranë Tij.

Këtu është një konspekt i historisë epike mijëvjeçare të treguar në Librin e Mormonit:

Në thelb, Libri i Mormonit është një histori rreth një familjeje. I ati i asaj familjeje, Lehi, është një profet në Jerusalemin e lashtë. Perëndia e paralajmëron Lehin në një ëndërr që të marrë familjen e tij dhe të largohet nga Jerusalemi, sepse qyteti dhe populli i tij së shpejti do të robërohen nga një komb tjetër. Ata kalojnë oqeanin për në kontinentin amerikan. Lamani dhe Lemueli, djemtë më të mëdhenj, nuk besojnë se ati i tyre, Lehi, ishte i frymëzuar. Ata ankohen përherë. Vëllai i tyre më i vogël, Nefi, është plot besim. Nefi zgjidhet nga Perëndia për të udhëhequr familjen dhe për të qenë mësuesi në të.

Njerëzit përfundimisht ndahen në dy grupe, nefitët dhe lamanitët. Këto grupe shpesh janë në luftë dhe besimi i tyre vihet vazhdimisht në provë. Ky besim mbush faqet e Librit të Mormonit në formën e predikimeve, profecive, mësimeve jetësore dhe përvojave shpirtërore të fuqishme.

Pasi Jezusi ringjallet në Jerusalem, Ai u shfaqet njerëzve në kontinentin amerikan. Ai u mëson atyre rreth pagëzimit, pendimit dhe faljes. Ai ua shëron të sëmurët dhe ua bekon fëmijët. Ai themelon Kishën e Tij. Ndryshe nga njerëzit në Jerusalem, njerëzit ia vënë veshin Jezusit. Më pas, ata jetojnë në paqe për qindra vjet. Me kalimin e kohës, njerëzit e humbasin besimin e tyre dhe një profet i quajtur Moroni i gropos analet e tyre për t’i ruajtur për një kohë dhe popull të ardhshëm – për ne! Jozef Smithi u drejtua tek ato anale dhe e përktheu Librin e Mormonit nëpërmjet fuqisë së Perëndisë. Mësimet e tij e rritin besimin te Jezu Krishti dhe frymëzojnë miliona njerëz sot.

Oraret e shërbesave në Kishë ndryshojnë nga bashkësia në bashkësi. Sidoqoftë, ju gjithmonë mund të keni pritshmërinë për një shërbesë kryesore adhurimi për të gjithë, që pasohet nga orët mësimore për fëmijët, të rinjtë dhe personat në moshë madhore.

Shërbesa për të gjithë quhet “mbledhja e sakramentit”. Kjo mbledhje përbëhet nga këngë, lutje dhe predikime (ose “biseda”) që bëhen nga anëtarë të ndryshëm të bashkësisë çdo javë. Por pjesa më e rëndësishme e mbledhjes është koha kur marrim sakramentin (që ngjason me kungimin) që të kujtojmë Shpëtimtarin.