Libri i Mormonit është një libër shkrimesh të shenjta të frymëzuara që ekziston për të na dhënë drejtim në jetën tonë dhe për të na lidhur me Jezu Krishtin. Nga vjen emri? Qindra vjet më parë në kontinentin e lashtë amerikan, një profet me emrin Mormoni përpiloi një anal të popullit të tij. Ata u përballën me shumë nga po ato sfida me të cilat përballemi ne. Dhe, po ashtu si ne, ata gjetën forcë kur iu drejtuan Jezu Krishtit.

Libri i Mormonit ka si synim të lexohet krahas Biblës si një dëshmi tjetër e Jezu Krishtit dhe e misionit të Tij hyjnor si Shpëtimtari dhe Shëlbuesi i botës. Së bashku, Bibla dhe Libri i Mormonit na e rritin kuptueshmërinë për dashurinë e madhe të Perëndisë për të gjithë ne dhe mund të na ndihmojnë të afrohemi më shumë me Të.

Ashtu si Bibla, Libri i Mormonit dëshmon për Jezu Krishtin. Ngjarja qendrore e shënuar në Librin e Mormonit, është vizita e Jezu Krishtit – përfshirë mësimet dhe shërbesën e Tij – te besimtarët në kontinentin e lashtë amerikan. Ky rrëfim tregon se Perëndia ua paraqet të njëjtat bekime dhe mundësi të gjithë fëmijëve të Tij dhe se dashuria e Tij nuk është e kufizuar për njerëzit nga një zonë e vetme e botës. Pavarësisht nga gjuha që flasim apo se si dukemi, Perëndia na do dhe dëshiron që të afrohemi më shumë me Të.

Këtu është një konspekt i historisë epike mijëvjeçare të treguar në Librin e Mormonit:

Në thelb, Libri i Mormonit është një histori rreth një familjeje. I ati i asaj familjeje, Lehi, është një profet në Jerusalemin e lashtë. Perëndia e paralajmëron Lehin në një ëndërr që të marrë familjen e tij dhe të largohet nga Jerusalemi, sepse qyteti dhe populli i tij së shpejti do të merren robër nga një komb tjetër. Ata kalojnë oqeanin për në kontinentin amerikan. Lamani dhe Lemueli, djemtë më të mëdhenj, nuk besojnë se i ati, Lehi, ishte i frymëzuar. Ata ankohen gjithë kohës. Vëllai i tyre më i vogël, Nefi, është plot besim. Nefi zgjidhet nga Perëndia për të udhëhequr familjen dhe për të qenë mësuesi i tyre.

Njerëzit përfundimisht ndahen në dy grupe: nefitët dhe lamanitët. Këto grupe shpesh janë në luftë dhe besimi i tyre vihet vazhdimisht në provë. Ky besim mbush faqet e Librit të Mormonit në formën e predikimeve e profecive të fuqishme, si dhe mësimeve jetësore dhe përvojave shpirtërore të fuqishme.

Pasi Jezu Krishti ringjallet në Jerusalem, Ai u shfaqet njerëzve në kontinentin amerikan. Ai u mëson atyre rreth pagëzimit, pendimit dhe faljes. Ai ua shëron të sëmurët dhe ua bekon fëmijët. Ai themelon Kishën e Tij. Ndryshe nga njerëzit në Jerusalem, ata ia vënë veshin Jezu Krishtit. Më pas, ata jetojnë në paqe për qindra vjet. Me kalimin e kohës, njerëzit e humbasin besimin e tyre dhe një profet i quajtur Moroni i gropos analet e tyre për t’i ruajtur për një kohë dhe popull të ardhshëm – për ne! Jozef Smithi u drejtua tek ato anale dhe e përktheu Librin e Mormonit nëpërmjet fuqisë së Perëndisë. Mësimet e tij e rritin besimin te Jezu Krishti dhe frymëzojnë miliona njerëz sot.

Libri i Mormonit dëshmon për Biblën dhe e plotëson atë, duke u dhënë më shumë qartësi dhe kuptueshmëri mësimeve të Jezu Krishtit. Është pak a shumë sikurse në Bibël, se si Mateu, Marku, Lluka dhe Gjoni tregojnë të njëjtat histori për Jezu Krishtin nga këndvështrime të ndryshme dhe kjo jep një tablo më të plotë.

Së bashku, Libri i Mormonit dhe Bibla përmbajnë frymëzim, udhërrëfim dhe udhëzim me vlerë mijëravjeçare. Duke i studiuar të dy librat, ju mund të merrni një kuptueshmëri më të mirë për atë se kush është Perëndia dhe çfarë dëshiron Ai për ju.

Oraret e shërbesave në kishë ndryshojnë nga një bashkësi në tjetrën. Sidoqoftë, ju gjithmonë mund të keni pritshmërinë për një shërbesë kryesore adhurimi për të gjithë, që pasohet nga orët mësimore për fëmijët, të rinjtë e të rejat dhe personat në moshë madhore.

Shërbesa për të gjithë quhet “mbledhja e sakramentit”. Kjo mbledhje përbëhet nga këngë, lutje dhe predikime (ose “biseda”) që bëhen nga anëtarë të ndryshëm të bashkësisë çdo javë. Por pjesa më e rëndësishme e mbledhjes është koha kur marrim bukën dhe ujin e sakramentit (që është i ngjashëm me kungatën) që të kujtojmë Shpëtimtarin.

Nëse do të doni të adhuroni me ne, misionarët mund t’iu përgjigjen pyetjeve tuaja, t’ju japin informacion rreth orarit dhe vendit të shërbesave tuaja vendore të adhurimit dhe më pas t’ju ruajnë një vend kur të jeni gati për ta bërë vizitën.