A Është i Vërtetë Perëndia?

Po. Dhe Ai ju njeh dhe ju do.

Perëndia është Ati i të gjithëve ne. Ai e njeh dhe e do secilin prej fëmijëve të Tij me një dashuri të dëlirë atërore. Për shkak se Ai jeton në qiell, ne shpesh e quajmë Perëndinë, Atin tonë Qiellor. Në sytë e Tij, ne jemi të gjithë të barabartë dhe jemi të gjithë të denjë për dashuri e lumturi. Perëndia e njeh dhe e kupton secilin prej nesh individualisht. Ai i njeh pikat tona të forta, dobësitë tona, shpresat tona dhe frikën tonë. Ati ynë i dashur Qiellor është i duruar, i dhembshur dhe i kuptueshëm. Pavarësisht se cilët jemi ose çfarë kemi bërë, Perëndia do që ne të zgjatemi drejt Tij, që Ai të mund të na ndihmojë përgjatë udhës. Ndërsa Ai na ndihmon të rritemi, ne do të fillojmë të kuptojmë dhe përjetojmë gëzim të vërtetë.

Ju mund ta njihni vetë Perëndinë

Perëndia e njeh secilin prej nesh dhe ne mund ta njohim Atë gjithashtu. Jezusi tha: “Dhe kjo është jeta e përjetshme, të të njohin ty, të vetmin Perëndi të vërtetë, dhe Jezu Krishtin që ti ke dërguar” (Gjoni 17:3).

Jezusi dha mësim se Perëndia, Ati ynë Qiellor na gjendet pranë kur zgjatemi drejt Tij. Ndërsa ndërtojmë një marrëdhënie me Perëndinë, ne mund të fillojmë ta përdorim fuqinë e Tij që të na ndihmojë për sfidat në jetën tonë. Ne mund ta fillojmë udhëtimin e njohjes së Perëndisë duke iu lutur Atij dhe duke lexuar fjalët e Tij.

Perëndia dhe Libri i Mormonit

Sikurse Bibla, Libri i Mormonit është fjala e Perëndisë. Ai gjendet për të na ndihmuar që të mësojmë më shumë rreth Tij. Teksa arrini ta njihni Atë, jeta juaj do të ndryshojë. E gjitha fillon duke u lutur dhe duke lexuar fjalët e Tij.

Libri i Mormonit do t’ju mësojë tri gjëra me vlerë

1. Perëndia ju do. Ju jeni fëmija i Tij dhe Ai është pranë jush.

2. Jeta juaj ka një qëllim. Teksa filloni të mësoni rreth këtij qëllimi, ju do të mbusheni me shpresë dhe lumturi.

3. Jezusi jetoi dhe vdiq për të gjithë ne. Teksa i ndjekim mësimet e Tij, ne mund të kthehemi të jetojmë një ditë me Perëndinë.

Miliona njerëz e kanë gjetur Perëndinë në Librin e Mormonit

Ja ku janë dy histori.

Historia e Shakilit

Shaki u rrit në Gjeorgji dhe u bë një vrapues profesionist. Edhe pse u rrit në një familje baptistësh, ai e gjeti Perëndinë nëpërmjet Librit të Mormonit.

“Gjatë periudhës së rritjes, u rrita në një familje jugore baptistësh. Edhe pse shkonim me raste në kishë, nuk e dija kurrë plotësisht nëse besoja në një Perëndi. Do të thosha që besoja, por nëse dikush më thoshte se Ai nuk gjendej pranë, do t’i thosha se mund të kishte të drejtë. Tani, e di vërtet se Ai është pranë. Por si është e mundur që dikush ta dijë diçka të tillë? Për këtë gjë pyesja veten sa herë që i dëgjoja njerëzit të thoshin: ‘E di’. Do t’jua them unë se si. Për mua, ishte shumë e thjeshtë. Më ishte shpjeguar mjaftueshëm thjesht se nëse lutesha, Perëndia do të më përgjigjej. Nuk isha lutur kurrë vetëm më parë, me sa mund të kujtoj, dhe kështu që vendosa të veproja sipas ftesës së thjeshtë. U luta muaj me radhë pa marrë ndonjë përgjigje të dallueshme. Si përfundim, hoqa dorë. Ndryshova mendje asokohe dhe mendova se ndoshta nuk kishte fare Perëndi. Kjo nuk zgjati shumë. Një natë e ndjeva shumë qartë se duhej të lutesha DHE të lexoja nga Libri i Mormonit. Nuk e kisha marrë kurrë mundimin më parë ta lexoja, sepse nuk e besoja që ishte i vërtetë. Dua që të gjithë ta dini se tani njëmend e di që ai është i vërtetë. Atë natë ndërsa lexova dhe u luta, arrita të dija se Perëndia jeton dhe se Libri i Mormonit është fjala e Tij. Nëpërmjet leximit, meditimit (të menduarit) dhe lutjes arrita ta dija. Në një mënyrë shumë reale, unë mora një dëshmi se Perëndia ishte, është dhe do të jetë gjithmonë pranë. Nëse nuk më besoni, nuk ka problem. Mos u bazoni te fjala ime. Thjesht provojeni atë. Merrni dëshminë tuaj vetjake, sepse atëherë ju nuk keni përse ta besoni atë që them unë – ju do ta dini vetë!”

– Shakil

Historia e Dejzit

Dejzi i njihte disa anëtarë të Kishës së Jezu Krishtit të Shenjtorëve të Ditëve të Mëvonshme, por ajo nuk e dinte se çfarë besonin. Pasi foli me misionarët në internet, ajo zbuloi një kuptueshmëri të re për Perëndinë dhe qëllimin e saj në jetë.

“Pasi u diplomova nga universiteti, shkova të punoja për një firmë kontabiliteti dhe një numër i madh të sapopunësuarish ishin nga UBJ-ja. Sa herë që takohesha me dikë nga UBJ-ja, i thosha: ‘Ti duhet të jesh atëherë një anëtar i Kishës së Jezu Krishtit të Shenjtorëve të Ditëve të Mëvonshme’, pa e kuptuar se sa haptazi po shprehesha (e duke i vënë në siklet kolegët e tjerë aty rrotull). Nga mosha 25-vjeçare, diçka dukej se mungonte dhe dëshiroja të dija qëllimin më të madh të jetës sime. Rastësisht, përfundova duke folur me një koleg rreth fesë së tij dhe ai më ftoi në kishë me familjen e vet. Nuk e mora seriozisht ftesën, por më ngjalli kureshtje dhe fillova të lexoja se çfarë besonin anëtarët e Kishës së Jezu Krishtit të Shenjtorëve të Ditëve të Mëvonshme përmes Mormon.org.” “Pashë disa materiale filmike dhe u emocionova, mund ta gjeja veten te shumë prej ndjenjave që po shprehnin këta njerëz duke dashur të di se çfarë ka përtej jetës. Gjeta një mundësi për të biseduar drejtpërdrejtë në internet me misionarët dhe, duke u ndier më rehat në internet, vijova dhe fillova të bisedoja me ta. Për t’i rënë shkurt historisë – përfundova duke bërë diskutimet me misionarët, duke bërë kërkime për Kishën me disa kolegë dhe mora guximin të lutesha dhe të pyesja nëse të gjitha këto gjëra ishin të vërteta apo jo. Sapo e kuptova që ishte e vërtetë, më duhej të pagëzohesha. Kështu që u pagëzova!”

– Dejzi

Kërkoni një Libër të Mormonit

Kërkojeni Tani

E Mëparshme

Shpirti i Shenjtë

Tjetër

Dashuria e Perëndisë