Dashuria e Perëndisë

Ne mund ta shohim dashurinë e Perëndisë në bekimet që Ai na jep. Që nga bukuria e botës deri te njerëzit në jetën tonë, Perëndia është duke na dhënë vazhdimisht dhurata të mëdha e të vogla për shkak se Ai na do.

Nganjëherë do të na pushtojë një ndjenjë në çaste plot paqe. Shpesh kur jemi jashtë në natyrë, kur bëjmë një lutje ose kur u shërbejmë të tjerëve, ne do ta përjetojmë këtë ndjenjë. Ajo ndjenjë është dashuria e Perëndisë.

Një nga veprat më të mëdha të dashurisë së Perëndisë për ne, ishte të dërgonte Birin e Tij, Jezusin, në tokë. Nëpërmjet mësimeve dhe hirit të Jezusit, ne mund ta ndiejmë dashurinë e Perëndisë, të marrim falje dhe të mësojmë se si t’i duam njerëzit rreth nesh.

Në një botë të rrëmujshme, diçka aq e brishtë dhe e shenjtë sa dashuria e Perëndisë mund të jetë e vështirë të dallohet. Dashuria e Perëndisë është më e lehtë të gjendet kur ne krijojmë çaste për ta gjetur atë.

Perëndia është një Atë i dashur në Qiell, i cili i do fëmijët e Tij dhe dëshiron t’i dëgjojë ata. Ne mund të lutemi që të kërkojmë ndihmë në jetën tonë dhe mund të lutemi që ta ndiejmë dashurinë e Tij. Nëse i kërkoni Perëndisë që ta ndieni dashurinë e Tij ndaj jush dhe jeni të duruar për atë përgjigje, ajo do të vijë.

Bibla na mëson se teksa jetojmë në paqe me njëri-tjetrin, ne mund ta ndiejmë dashurinë e Perëndisë. Në fakt, dashuria ndaj të tjerëve na ndihmon të kuptojmë dashurinë e Perëndisë për ne. Teksa i duam dhe u shërbejmë të tjerëve, ne do ta ndiejmë dashurinë që po kërkojmë nga Perëndia.

Ne mund të mësojmë rreth dashurisë së Perëndisë duke e studiuar fjalën e Tij. Teksa e lexojmë Biblën dhe Librin e Mormonit, ne mësojmë se gjatë gjithë historisë, Perëndia nuk ka reshtur kurrë së dashuri popullin e Tij. Kjo mund të na ndihmojë ta dallojmë dashurinë e Perëndisë në vetë jetën tonë.