#DukeNisurNgaSot, Gjeni Më Shumë Nëpërmjet Jezu Krishtit

Gjatë gjithë vitit, anëtarët e Kishës së Jezu Krishtit të Shenjtorëve të Ditëve të Mëvonshme përpiqen ta mbajnë të shenjtë ditën e Shabatit duke adhuruar në kishë dhe duke e përqendruar ditën në veprimtari që na ndihmojnë të afrohemi më shumë me Jezu Krishtin. E diela e Pashkës sjell një përqendrim të veçantë te Ringjallja e Krishtit. Ai përqendrim ndodh kur familjet lexojnë së bashku fragmente rreth Ringjalljes në Bibël ose kur bashkësitë përfshijnë numra muzikorë për Pashkën në shërbesat e tyre të adhurimit. 

Shumë shenjtorë të ditëve të mëvonshme kremtojnë ngjarje që i paraprijnë Pashkës, si e Diela e Palmave, dhe e Premtja e Mirë, duke i studiuar ngjarjet e Javës së Shenjtë, duke dëgjuar këngë rreth Jezu Krishtit dhe duke shijuar një vakt të veçantë me familjarët dhe miqtë. Disa anëtarë zgjedhin ta kremtojnë periudhën festive edhe me tradita nga vendet e tyre, të tilla si zbukurimi i vezëve të Pashkës, organizimi i një gjuetie vezësh Pashke, dhënia e dhuratave, çokollatave ose gjërave të tjera, blerja e zambakëve të Pashkës ose shërbimi ndaj të tjerëve.

Kisha e Jezu Krishtit e Shenjtorëve të Ditëve të Mëvonshme e kremton Pashkën në të njëjtën ditë si shumica e besimeve të tjera të krishtera nëpër botë, një planifikim që varet nga hëna. Pashka bie të dielën e parë pas hënës së plotë të parë që vjen pas ekuinoksit pranveror kishtar.

Kishat e hershme të krishtera u orvatën ta përputhnin kremtimin e Pashkës me tregimin e Ringjalljes në Dhiatën e Re, ku thuhet se Darka e Fundit e Jezusit me dishepujt e Tij përpara se të kryqëzohej, ishte pjesë e festës së Pashkës judease. Pashka judease kremtohet sipas kalendarit hënor hebraik. Me kalimin e kohës, u bënë përshtatje për të krijuar një llogaritje më të standardizuar të datës (të tillë si fakti që Pashka të bjerë në një ditë të diel) dhe rezultati është që data e sotme e Pashkës ndikohet ende nga ciklet hënore por nuk përputhet më me datat e Pashkës judease.

Nëse nuk keni adhuruar kurrë me ne më parë, por do të donit të vinit në kishë të dielën e Pashkës, ja pak informacion rreth asaj që duhet të prisni. Gjithashtu mund të mësoni më shumë këtu.

• Shërbesa jonë kryesore e adhurimit quhet mbledhja e sakramentit. Ajo përfshin një lutje hapje dhe mbyllje, himne që këndohen nga bashkësia dhe predikime (ose “biseda”) që jepen nga anëtarët e bashkësisë.
• Ne gjithashtu marrim sakramentin, ku kemi mundësinë të hamë një copëz bukë dhe të pimë një gotë të vogël uji për të kujtuar flijimin e Jezu Krishtit për ne, ashtu sikurse Ai ua mësoi dishepujve të Tij gjatë Darkës së Fundit.
• Ju mund të merrni pjesë aq sa të dëshironi, t’i këndoni edhe ju himnet, ose thjesht të dëgjoni, dhe mund ta merrni sakramentin ose thjesht t’ia kaloni dikujt tjetër tabakanë.
• Me gjasë, shumica e grave në bashkësi do të kenë veshur fund ose fustan dhe shumica e burrave do të kenë veshur këmishë të bardhë dhe kollare. Por, ju lutemi, vishuni si të jeni më rehat.
• Ne nuk kërkojmë dhurime ose të kalojmë një shportë për grumbullim dhurimesh gjatë shërbesave.

Shërbesat tona të adhurimit gjatë gjithë vitit përqendrohen te Jezu Krishti, përfshirë kohën që shpenzojmë çdo të diel duke e kujtuar Atë gjatë sakramentit.

Të dielën e Pashkës, predikimet përqendrohen posaçërisht te flijimi i Jezusit për ne dhe te Ringjallja e Tij. Udhëheqësit vendorë shpesh zgjedhin ta vënë bashkësinë të këndojë himne të posaçme për Pashkën të tilla si “Zoti Krisht Ësht’ Ngritur Sot” ose t’i kërkojnë dikujt të interpretojë një numër muzikor të veçantë rreth Shpëtimtarit.

Mbledhjet shtesë përveç shërbesës kryesore të adhurimit, të tilla si orët mësimore të Shkollës të së Dielës ose provat e korit, anulohen në mënyrë që njerëzit të mund të shpenzojnë më shumë kohë me familjen.

Libri i Mormonit: Një Dëshmi Tjetër e Jezu Krishtit është një libër me shkrime të shenjta që, krahas Biblës, dëshmon për rolin e Jezu Krishtit si Shpëtimtari ynë dhe na mëson se si ta ndjekim Atë.

Ngjarja kulmore e Librit të Mormonit është vizita e Jezusit te “delet e tjera” të Tij në kontinentin e lashtë amerikan pas Ringjalljes së Tij. Atje, njerëzit i prekën shenjat e gozhdëve në duart dhe këmbët e Tij dhe plagën në ijën e Tij, dhe e adhuruan Atë si Shpëtimtarin e profetizuar. Ashtu sikurse bëri gjatë shërbesës së Tij në Lindjen e Mesme, Jezusi i shëroi, i bekoi dhe u dha mësim turmave të njerëzve dhe organizoi Kishën e Tij.

Mund ta lexoni tregimin e plotë në Librin e Mormonit për vizitën e Jezu Krishtit në kontinentin amerikan këtu: 3 Nefi 11–28.