Të Jetuarit e Shëndetshëm
Ju mund ta dini se shenjtorët e ditëve të mëvonshme nuk pinë alkool ose duhan. Por a e dini arsyen?
Çfarë është Fjala e Urtësisë?
Kudo në Bibël, Perëndia i kërkoi popullit të Tij që të hiqnin dorë nga ushqime të caktuara. As në ditët tona nuk është ndryshe. Perëndia ka dhënë këshilla të urta për t’i ndihmuar të gjithë fëmijët e Tij që të jenë të shëndetshëm. Kjo quhet Fjala e Urtësisë. Ajo përvijon mënyra të frymëzuara, për ta përmirësuar mirëqenien tonë fizike dhe shpirtërore. Sipas saj, ne këshillohemi të hamë ushqime me vlera ushqyese dhe të shmangim substanca që krijojnë varësi.
Gjërat që Duhen Bërë dhe Nuk Duhen Bërë sipas Fjalës së Urtësisë
“Çdo bimë në stinën e saj dhe çdo frut[ë] në stinën e tij; të gjitha për t’u përdorur me maturi dhe falënderim” (Doktrina e Besëlidhje 89:11).
“Dhe përsëri, pijet e forta nuk janë për barkun, por për larjen e trupave tuaj” (Doktrina e Besëlidhje 89:7).
“Po, gjithashtu mishin e kafshëve dhe të shpendëve të ajrit, unë, Zoti, e kam shuguruar për përdorimin e njeriut me falënderim; megjithatë ato duhet të përdoren me pakicë” (Doktrina e Besëlidhje 89:12).
“Dhe përsëri, duhani nuk është për trupin, as për barkun, dhe nuk është i mirë për njeriun” (Doktrina e Besëlidhje 89:8).
“Për t’u kujdesur për trupin tuaj, përdorni ushqime me vlera ushqyese, bëni rregullisht ushtrime fizike dhe flini mjaftueshëm” (Për Forcën e Rinisë [broshurë, 2011], f. 25).
“Dhe përsëri, pijet e nxehta nuk janë për trupin apo barkun” (Doktrina e Besëlidhje 89:9).
“Gjithë drithi shugurohet për përdorimin e njeriut dhe të kafshëve, për t’u bërë burim jete” (Doktrina e Besëlidhje 89:14).
“Çdo gjë e dëmshme që njerëzit fusin me qëllim në trupat e tyre, nuk është në harmoni me Fjalën e Urtësisë. Kjo është veçanërisht e vërtetë për drogat e paligjshme” (Të Vërtetë ndaj Besimit: Një Referim për Ungjillin [2005], f. 55).
Ne nxitemi gjithashtu të flemë mjaftueshëm, të bëjmë rregullisht ushtrime fizike dhe të agjërojmë një herë në muaj – ku heqim dorë nga dy vakte të njëpasnjëshme – që të na ndihmojnë të jemi të shëndetshëm, të ushtrojmë disiplinën dhe të bëhemi më të harmonizuar shpirtërisht.
Bekimet nga të jetuarit sipas Fjalës së Urtësisë
Atyre që e ndjekin këshillën e Perëndisë në Fjalën e Urtësisë, u premtohet se do të marrin shëndet, do të gjejnë urtësi dhe “do të vrapojnë e nuk do të lodhen, dhe do të ecin e nuk do të këputen” (DeB 89:18–20).
Është e mrekullueshme të mendosh se, kur u zbulua Fjala e Urtësisë në vitin 1833, bota nuk i kuptonte bazat shkencore të efekteve që kishin gjëra të tilla si dieta, alkooli dhe duhani. Tani, kodi i shëndetit i përshkruar në Fjalën e Urtësisë pranohet gjerësisht madje edhe në rrethet shkencore. Studiuesit kanë treguar në mënyrë të përsëritur pasojat negative të pirjes së alkoolit, cigares dhe përtypjes së duhanit, duke përfshirë sëmundje të tilla si cirroza, pankreatiti dhe shumë lloje kanceri.
Është zbuluar gjithashtu se njerëzit që e zbatojnë Fjalën e Urtësisë, kanë prirjen të jetojnë më gjatë. Që nga viti 1980 deri në 2004‑ën, Universiteti i Kalifornisë – Los Anxhelos, bëri një studim për shenjtorët e ditëve të mëvonshme që i zbatonin udhëzimet për shëndetin në Fjalën e Urtësisë. Rezultatet e studimit 25‑vjeçar treguan që ky stil jetese ishte i lidhur me pritshmërinë për një jetë më të gjatë.
Një burrë përshkruan zotimin e tij për të zbatuar urdhërimin e Perëndisë për t’u kujdesur për trupin që Ai na ka dhënë.
Ne nxitemi që të kujdesemi për trupat tanë për shkak se ata janë dhuratë nga Perëndia. Të kuptuarit e kësaj marrëdhënieje ndikon në mënyrën se si kujdesemi për veten.
“A nuk e dini se trupi juaj është tempulli i Frymës së Shenjtë që është në ju, të cilin e keni nga Perëndia, dhe se nuk i përkitni vetvetes?”
1 Korintasve 6:19
Kur i trajtojmë trupat tanë si tempuj dhe si dhurata të dhëna nga Perëndia, ne marrim bekime emocionale dhe shpirtërore, të tilla si një marrëdhënie më të ngushtë me Perëndinë dhe një kuptim më të madh për identitetin tonë hyjnor.
Është e qartë se shëndeti fizik dhe mirëqenia shpirtërore shkojnë krah për krah. A dëshironi ndihmë për përmirësim të shëndetit tuaj fizik dhe shpirtëror? Organizoni një takim me misionarët tanë. Ata mund t’ju ndihmojnë t’i vini në praktikë mësimet te Fjala e Urtësisë në mënyrë që të mund të përjetoni bekime më të mëdha në jetën tuaj.
