Nëse e keni lexuar ndonjëherë Dhiatën e Re, ka të ngjarë që ta njihni historinë kur Jezusi viziton Gjon Pagëzorin për t’u pagëzuar.

“Atëherë erdhi Jezusi nga Galileja në Jordan te Gjoni për t’u pagëzuar prej tij. Por Gjoni e kundërshtoi fort duke i thënë: ‘Mua më duhet të pagëzohem prej teje dhe ti po vjen tek unë?’ Dhe Jezusi, duke iu përgjigjur, [i] tha: ‘Lejo të bëhet për tani, sepse në këtë mënyrë përmbushim çdo drejtësi’.” – Mateu 3:13–15

Edhe Jezusi, që nuk mëkatoi kurrë, u pagëzua që t’i tregonte bindje Perëndisë dhe të ishte shembulli që ta ndiqnim ne.

Jezusi dha mësim se ne duhet të pagëzohemi për t’u kthyer që të jetojmë në praninë e Perëndisë pasi të ketë kaluar kjo jetë.

“Jezusi u përgjigj: ‘Në të vërtetë, në të vërtetë po të them se kush nuk ka lindur nga uji dhe nga Fryma, nuk mund të hyjë në mbretërinë e Perëndisë’.” – Gjoni 3:5

Pagëzimi është të “lind[esh] nga uji”. Ai bën të mundur që ne të pastrohemi nga mëkatet tona, çka është e nevojshme për ne që të kthehemi te Perëndia.

Pagëzimet në Kishën e Jezu Krishtit të Shenjtorëve të Ditëve të Mëvonshme kryhen me anë të zhytjes, që do të thotë se një njeri “zhytet” i gjithi nën ujë dhe nxirret prapë. Bibla na tregon se “sapo [Jezusi] u pagëzua, [Ai] doli nga uji” (Mateu 3:16). Pagëzimi me anë të zhytjes është simbolikë e bukur, jo vetëm e heqjes së mëkateve por e vdekjes, varrimit dhe ringjalljes. Pagëzimi përfaqëson mbarimin e mënyrës së vjetër të jetës dhe lindjen në një jetë të zotuar ndaj vlerave të krishtera (shihni te Romakëve 6:3–6).

Shenjtorët e ditëve të mëvonshme besojnë se pagëzimi duhet të kryhet nga dikush që mban autoritetin e duhur të priftërisë. Ai autoritet drejtpërsëdrejti nga Jezu Krishti u rikthye nëpërmjet rivendosjes së Kishës së Tij.

Ndonëse vetë pagëzimi është një ngjarje domethënëse, nuk është tërësisht i plotë pa marrë dhuratën e Frymës së Shenjtë (ose Shpirtin e Shenjtë). Marrja e Frymës së Shenjtë është të lindesh nga Shpirti (shihni te Gjoni 3:5). Dhurata e Frymës së Shenjtë ju jepet pas pagëzimit, që të mund të merrni ndihmën, udhërrëfimin dhe ngushëllimin e Perëndisë gjatë gjithë jetës suaj.

Apostulli Pjetër e bëri gjithashtu të qartë që pagëzimi është një urdhërim për të gjithë njerëzit: “Pendohuni dhe secili nga ju le të pagëzohet në emër të Jezu Krishtit për faljen e mëkateve, dhe ju do të merrni dhuratën e Frymës së Shenjtë” (Veprat e Apostujve 2:38).

Përpara se të pagëzoheni, ju tregoni dëshirën tuaj për t’i zbatuar urdhërimet e Perëndisë duke u penduar për gjërat që keni bërë gabim. Kjo mund të kërkojë rrëfimin e mëkateve tuaja përpara se të pagëzoheni (shihni te Mateu 3:6) ose ndreqjen e gabimeve aty ku mundeni.

Kur pagëzoheni, ju keni mundësinë të nisni një jetë të re, një jetë të përkushtuar në ndjekjen e Jezu Krishtit. Mëkatet tuaja falen dhe ju mund t’ia kushtoni sërish veten bërjes së zgjedhjeve që çojnë në lumturi. Pasi të jeni pagëzuar dhe ta merrni dhuratën e Frymës së Shenjtë, Ai do t’ju ndihmojë, ngushëllojë dhe udhërrëfejë në përpjekjet tuaja.