Kur vdesim, shpirti dhe trupi ynë ndahen. Edhe pse trupi ynë vdes, shpirti ynë – që është thelbi i asaj që jemi – vazhdon të jetojë. Shpirti ynë shkon në botën e shpirtrave. Bota e shpirtrave është një periudhë pritjeje derisa të marrim dhuratën e ringjalljes, kur shpirtrat tanë do të ribashkohen me trupat tanë. Trupi ynë i ardhshëm, i ringjallur nuk mund të vdesë dhe do të jetë i përsosur – i çliruar nga dhembja, sëmundja dhe papërsosuritë. Është për shkak të dashurisë së pafundme të Jezu Krishtit që çdo njeri do të ringjallet.

Në kohën e ringjalljes do të ndodhë që secili prej nesh do të gjykohet individualisht nga Jezusi, Shpëtimtari ynë. Ky gjykim përfundimtar do të bazohet mbi dëshirat, veprimet dhe zgjedhjet tona.

Vetëm Perëndia dhe Jezusi i njohin në mënyrë të përsosur zemrat tona dhe rrethanat e jetës sonë, kështu që vetëm ata mund të na gjykojnë me përsosuri. Ky gjykim do të jetë një gjykim mëshire, shërimi e dashurie (shihni te Zbulesa 21:4).

Synimi përfundimtar i Perëndisë është t’i ndihmojë të gjithë fëmijët e Tij që të kthehen për të jetuar me Të në mbretërinë çelestiale. Sidoqoftë, janë zgjedhjet tona në këtë botë dhe kohë që do të përcaktojnë se ku do ta kalojmë përjetësinë. Ne duhet të besojmë te Jezu Krishti, të pendohemi për mëkatet tona, të pagëzohemi në emrin e Tij dhe të marrim dhuratën e Shpirtit të Shenjtë. Ne gjithashtu nevojitet të zbatojmë urdhërimet gjatë gjithë pjesës tjetër të jetës sonë – dhe të pendohemi kur nuk ia dalim dot.

As Ringjallja, as shpëtimi nga mëkatet tona nuk do të ishin të mundur pa Jezu Krishtin. Ai vuajti për mëkatet tona në mënyrë që kur të lutemi për falje dhe të përpiqemi të ndryshojmë, ne të mund të jemi të pastër. Ai gjithashtu vdiq në kryq dhe u ngrit së vdekuri. Fuqia e Jezusit mbi vdekjen do të thotë që çdo njeri do të ringjallet, pavarësisht nëse ata besojnë ose jo tek Ai. Për shkak të Jezusit, vdekja nuk është fundi. Libri i Mormonit jep njohuri shtesë dhe na mëson rreth rolit të Jezu Krishtit në planin e Atit Qiellor për ne. Duke e lexuar Librin e Mormonit dhe duke iu lutur Perëndisë, ju mund të dini rreth vërtetësisë së planit të Perëndisë.