Ashtu si prindërit tuaj këtu në tokë, Ati juaj Qiellor dëshiron të dëgjojë prej jush dhe të bisedojë me ju. Kur luteni, Ai dëgjon. Pastaj Ai u përgjigjet lutjeve tuaja në formën e mendimeve, ndjenjave shpirtërore, shkrimeve të shenjta ose edhe veprimeve të njerëzve të tjerë.

Shkrimet e shenjta japin mësim se “Perëndia është dashuri” (1 Gjoni 4:8). Ju mund ta ndieni atë dashuri ndërsa flisni përditë me Të nëpërmjet lutjes, duke kërkuar udhërrëfimin e Tij në jetën tuaj.

Të luturit dhe të mbajturit vesh për përgjigjet që ju jep Perëndia, mund t’ju ndihmojnë ta kuptoni më mirë qëllimin tuaj në jetë. Perëndia do t’ju ndihmojë të kuptoni arsyen përse jeni këtu dhe çfarë mund të bëni që të ktheheni të jetoni me Të pas kësaj jete.

Kur i luteni privatisht Perëndisë, ju mund të arrini të merrni vendime serioze në jetën tuaj. Perëndia mban përherë vesh dhe shpesh ofron përgjigjet dhe udhërrëfimin specifik që kërkojmë. Edhe kur Ai zgjedh të mos përgjigjet menjëherë ose në mënyrën që mund të kishim shpresuar, vetë lutja është një mënyrë për të gjetur paqe.

Jezusi i këshilloi dishepujt e Tij: “Rrini zgjuar dhe lutuni, që të mos bini në tundim” (Mateu 26:41). Nëpërmjet lutjes, ne mund t’i mposhtim tundimet për të mëkatuar. Lutuni për ndihmën e Perëndisë që t’ju ruajë nga bërja e zgjedhjeve të gabuara. Kjo do t’ju japë forcën të bëni atë që është e drejtë.

Qëllimi i lutjes nuk është domosdoshmërisht që t’i tregoni Perëndisë se si doni që t’i bëjë gjërat Ai. Përkundrazi, është që ta kuptoni më mirë Atë dhe mënyrat e Tij, duke e vënë veten në pajtim me vullnetin e Tij. Sikurse shpesh mendohet C. S. Ljuisi të ketë thënë: lutja “nuk ndryshon Perëndinë. Ajo më ndryshon mua.”

Jezusi agjëroi për 40 ditë e 40 net përpara se të fillonte shërbesën e Tij në tokë. Ndërsa e bënte atë, Ai bisedoi në lutje me Atin e Tij në Qiell. Në mënyrë të ngjashme, nëse luteni dhe agjëroni, ju mund të ndiheni më pranë Perëndisë dhe t’i kuptoni më mirë gjërat që Ai do që ju të bëni.

Kudo nëpër shkrimet e shenjta, ne shohim shembuj të shumtë të Zotit tek bën mrekulli si përgjigje ndaj lutjes. Në kohët e Dhiatës së Vjetër, profetin Daniel e hodhën në një gropë luanësh ngaqë nuk pranoi të ndalonte së luturi. Kur ai iu lut Perëndisë në gropën e luanëve, engjëj u shfaqën dhe ua mbyllën gojën luanëve. Përmes lutjes së përditshme, edhe ju mund të përjetoni mrekulli vetjake të tilla si shërim, paqe dhe falje për mëkatet.

Ndërsa luteni çdo ditë, ju e ftoni Shpirtin e Shenjtë të jetë me ju dhe t’ju ngushëllojë e drejtojë. Shpirti i Shenjtë mund t’jua japë përgjigjet, mund t’ju ndihmojë ta ndieni dashurinë e Perëndisë dhe t’ju sjellë ndjenja paqeje e gëzimi në zemër.

Jezusi dha shembullin e përkryer për lutjen. Nëse përpiqeni ta ndiqni shembullin e Tij nëpërmjet lutjes, ju do të bëheni më shumë si Ai dhe do të zhvilloni një marrëdhënie më të mirë me Të dhe Atin Qiellor.